د ڤێ لێكولینێدا كو ل ژێر ناڤێ (رێكێن جه‌ختكرنێ د دیالێكتا كرمانجیا سه‌ریدا (گۆڤه‌را به‌هدینی))یه‌، مه‌ هه‌ولدایه‌ تیروشكه‌كێ به‌رده‌ینه‌ سه‌ر رێكێن جه‌ختكرنێ، چونكی ئه‌ڤه‌ بابه‌ته‌كێ گه‌له‌ك گرنگه‌ و ب شێویه‌كێ به‌رفره‌ه د ئاخڤتنا روژانه‌دا بكاردهێت. سه‌ره‌رای گرنگی و به‌هایێ وێ د بوارێ زمانیدا، به‌لێ د گۆڤه‌را به‌هدینیدا هه‌تا نهو چ لێكولینێن ئه‌كادیمی یێن تایبه‌ت ب ڤی بابه‌تیڤه‌ نه‌هاتینه‌ ئه‌نجامدان. لێكۆلین ل دویڤ ڕێبازا وه‌سفی هاتیه‌ ئه‌نجامدان و نموونێن وێ ژی ژ دیالێكتا كرمانجیا سه‌ری - گۆڤه‌را به‌هدینی هاتینه‌ وه‌رگرتن و مه‌ره‌ما مه‌ ژ ڤێ لێكولینێ دیاركرنا رێكێن جه‌ختكرنێیه‌ كا چه‌ند و چه‌وانن؟ هه‌تا چ راده‌كی پێگیریكرن، یان لادان ب یاسا و ده‌ستورێن رێزمانی دێ خزمه‌تا بابه‌تێ لێكولینێ كه‌ت.