Бугунги кунда топонимика олдига барча шаҳарлар микротопонимиясини тилшунослик ютуқлари асосида тадқиқ этиш вазифаси қўйилмоқда. Тилшунослик нуқтаи-назаридан топоним аввало қайсидир тилдан олинган сўз эканлиги, атоқли отлиги, сўз туркими бўлиши билан тавсифланади. У тилнинг алоҳида қатламини ташкил этиб, уни шаклланиш тарихини ва ривожланишини ўзида акс эттиради. Шунингдек, умумий тилшунослик нуқтаи-назаридан олиб қарайдиган бўлсак, топонимлар ҳам ўз хусусиятларига кўра лингвистик, тарихий, географик топонимика шаклида тилшуносликда муҳим аҳамият касб этади.